Commo seis inoghe: Home Chie semus
Chie semus
Sos Isportellos Linguìsticos PDF Stampa E-mail
Iscritu dae Gianfranca Piras (Mandamentu VII 2011)   
Martis, su 22 de Martzu 2011 12:52

Sos isportellos linguìsticos

Sos isportellos linguìsticos territoriales (connotos comente Ufìtzios de sa Limba Sarda) naschent pro more de sa lege natzionale 482/1999 e de su D.P.R. 345 de su 2 de maju de su 2001. Sa funtzione de custos isportellos est sa de assegurare sa presèntzia in totue de operadores cumpetentes chi potzant fàghere promotzione a sa limba sarda dende·li visibilidade in intro de sas amministratziones pùblicas e de sos logos in ue s’agatant.Custos ufìtzios los ant ativados in belle totus sas realidades sardas. Barantases Comunes de sa Sardigna tzentrale oe òperant suta sa ghia de sa Provìntzia de Nùgoro chi, in calidade de Ente capofila, faghet de coordinadore de sas atividades.

Ite sunt e a ite serbint

Sa funtzione primària de sos isportellos linguìsticos est de fàghere promotzione de sa limba, e pro fàghere custu tocat in antis de totu chi s’ufìtziu siat visìbile e bene cullegadu cun totu sos ufìtzios de s’ente in ue òperat. Chie ànimat s’ufìtziu est s’operadore, chi in antis de totu devet connòschere bene sa limba faeddada e sas normas de sa limba iscrita. In prus devet tènnere finas sa capatzidade de cumprèndere sas chi podent èssere sas atziones de polìtica linguìstica prus adatas in su territòriu. Est importante a ischire tratare cun sa gente, pro traballare paris cun sos àteros dipendentes e organismos chi si ocupant de promotzione de sa limba. A s’urtimata, s’operadore de un’ufìtziu de sa limba sarda est sa madrighe chi agiuat su territòriu a cumprèndere chi sa limba sarda si podet impreare in cale si siat cuntestu.